واسم التهمة اخوانى

وجع وفى قلب يتعبني
فى وسط الليل مغلبني
وبسأل نفسي ليه بابني
وغيري بيهدموا فيكي
وارجع تانى واناديكي
يروح عمري وافديكي
ولو ترضى اكون ليكي
واموت مبسوط ما خاف من سوط
ورغم الضرب اعلى الصوت
لمين غيرك يهون الموت
يامصر يا اعز اوطاني
ولو قالوا فى يوم جاني
واسم التهمة اخوانى
ورغم ما اشوف وما اعاني
هقول برضه يطول عمرك ياسجاني
ويهديك ربي ياجاني
وتعرف حق اوطاني
واموت لو موتى فيه راحتك
واعيش ساكت عشان خاطرك
ولو حكموني بعساكر وجيش كامل
هيفضل قلبي ليكي حامل
وانا راضى وهتحاكم
ومهما يكون مين الحاكم
ولو قالوا فى يوم شاطر
ويعرف يكسب الخاطر
عشان خاطرك لازم اخاطر
لو حتى منش قادر
واصحي ولادي من نومهم
يشوفوا شيطان بيخنقهم
ويسرق بسمه من فوقهم
عشان يبقى على الكرسي
وترسي زي ما ترسي
ياحلى سفينة فى حياتى
عليكي حلم اولادي
ولاجلك كل شئ عادي
يامصر يا غالية يابلادي

اهداء الى المهندس خيرت الشاطر واخوانه

سيدى الوزير روح استقيل

سيدى الوزير روح إستقيل

لاحسن خلاص الصبر قليل

خليتوا شعبى يعيش ذليل

ونفسكم يفضل عايش ضليل

اشمعنا الحجاب فيه قال وقيل

وكلام سيادته الطويل

اللى مفهوش اي دليل

لازم يكون صح وجميل

وكونه يغلط ده مستحيل

سيدى الوزير ممكن سؤال

هى بلدنا ليه حالها مال

والفقر عمال ينتشر

والاغتصاب ع المفتشر

وشعب عمال يتقهر

وحكومة خايفة تعتذر

يكونش الحجاب هو السبب

معلش..قليل الادب!!
مانتوا كلامكم كله عجب

قال ايه مامته مالبستوش

تقولش ام المؤمنين

او عائشة بنت الامين

وكلنا بيها مهتدين

وعلى كلامها نقول امين

بقولك ايه بدل م ألبخ فى الكلام

روح استقيل وسيبلى الآلام

كله تمام

سيدى الرئيس اخر كلام

بلدنا حلوة وكلة تمام

والعيشة فلة وكله ماشى

ولا فينا سارق ولا فينا راشى

ولافيش مجاري جوة البيوت

ولافينا حد م الجوع يموت

وفلوسة كتيرة مليه الجيوب

وبلدنا خالية من العيوب

ولا دين محمد يتشتم

ولا نبينا بيترسم

من بعد وقفة المصير

لما طردتم السفير

وبعتوا رفض مع الوزير

سيدى الرئيس اخر الكلام

شكرا اليكم وكله تمام

انا مش موافق سيادة الرئيس

أنا مش موافق سيادة الرئيس

انك تسيب لنا إبنك ونيس

وتخلّي شعب بلادك تعيس

ماخلاص ياريس الواد عريس

وهو سيدنا وهو الوريث

سيدى الرئيس أنا مش موافق

أقولها حاضر..وأكون منافق؟؟

أقولها حاضر عشان أعيش

أقولها حاضر اكلنا عيش

وابعد ياريس إيد الشويش

مانتوش ياريس اصحاب الهرم

ومن بعدكم راح يتخرم

والشعب هيموت م الألم

وخلاص بقينا ع الحديد

وزهقنا م الفكر الجديد

وسلام لأجدع سكة حديد

لا فيها قطر بينقلب

ولا فيها حق بيتسلب

وبقولها" لأ" صوتى مش رخيص

انا مش موافقك سيادة الرئيس

بلد العجايب يابلد

مصر يابلدي يابلد العجايب
مظلوم عيالك والحق غايب
وزهقنا من كتر المصايب
ولا فيه رقابة ولا فيه محاسب
مصر يابلدي يابلد العبيد
الصبر فيكى فل الحديد
وزهقنا من الفكر الجديد
ولا فيكى فرحة ولا فيك عيد
وزي منتى مفيكيش جديد
من قليوب لحد الصعيد
ياتانى اكبر سكة حديد
مات الكبير ويا الوليد
والفقر فيكى عمرة مديد
والسرقة فيكى اكبر شهيد
سيدنا الوزير بألف أيد
عمال يمص دم العبيد
مصر يابلدي يام الهرم
زهقنا من كتر الالم
شيفيين ولادنا بالكمم
متفرقيين بين الامم
والمسئولين باعو الزمم
مصر يابلدي يام الربوط
فيكى يابلدي شبعنا موت
والشعب خايف يطلعلوا صوت
وعجبوا يابلدي طعم السكوت
واستكفى بصلاة القنوت
علشان من السجان يفوت
حاكم بلدنا اخر كلام
علشان نعيش فى امن وسلام
لازم تعيد حق الانام
وساعتها مصر تكون تمام

سيدى الرئيس لتانى مرة

سيدى الرئيس لتانى مرة

بقولهالك عشتنا مرة

سيدى الرئيس مفيش مسرة

بنزين وعيش وهلم جرة

سيدى الرئيس لتانى مرة

بقولهالك عشتنا مرة

سيدى الرئيس اسمع كلامي

ولو سمحت حس بألامي

جوه بلدنا بنحتاج محامي

وحقى ضايع وممنوع كلامي

سيدى الرئيس لتانى مرة

بقولهالك عشتنا مرة

سيدي الرئيس هو انت فاهم

ان بلدنا فيها فقر دايم

وخيرها فى سويسرا مساهم

وياخوفى لتكون ياسيدى واهم

اننا لكلا م سيادتك مصدقيين

او اننا عن حكمكم راضيين

او اننا من ظلمكم مش مخنوقيين

سيدى الرئيس لتانى مرة

بقولهالك عشتنا مرة

سيدى الرئيس الحق تاه

مش مصر بردك فيها قناه

وغاز طبيعى وزيت ومياه

والشعب دايخ فين يلقاه

ومفيش ياريس فلوس وياه

سيدى الرئيس لتانى مرة

بقولهالك عشتنا مرة

سيدى الرئيس لو لينا خاطر

عيشين ياريس بين المخاطر

اكل مسرطن وزيت مقاطر

والناس فقيرة وهموم كتييرة

واللى بيسرق هو اللى شاطر

سيدى الرئيس لتانى مرة

بقولهالك عشتنا مرة

سيدى الرئيس الحق ضايع

وعلى القهاوي شبابنا صايع

والكل شايف والكل سامع

سيدى الرئيس لتانى مرة

بقولهالك عشتنا مرة

سيدى الرئيس .. بليز

ياسيدي الرئيس

بقولهالك بليز

وممكن لو سمحت

تبص لمرة تحت

ممكن تحس بينا

وتبص مرة علينا

دحنا الشعب اللي اصلا

مفروض انك حمينا

ياسيدي الرئيس

بقولهالك بليز

تشوف حال المواطن

اللي فى الفقر قاطن

وتشوف عشش ومقابرسكن فيها البشر

يدوئه فوق المر مر

ويعيش تحت الخطر

وده حكم القدر

خلاك فوقنا رئيس

موافقين وبنفس راضيه

بس يعيشو عيشه هادية

ياسيدي الرئيس

بقولهالك بليز

محنش عايزينها باريس

عاوزين مصر بلدنا

يكون فيها فعلا رئيس

حتى اسألوا عز الامين

بحلف يابلدي بكل غالي و رخيص
كل مشاكلك حلها أصبح عويص
ده مش هزار ولا كلام تهجيص
السرقة فيكى معلمة وفن وتدريس
بس اللي يفرس إننا دايما تمنا رخيص
تمن بلدنا.. قصدى اللي باقى منها
من قوت عيالها وشعبها
كله يروح للمجرمين
حتى اسألوا عز الأمين
طبعا عرفتوا أمين..لمين؟؟
طب اسألوه جبهم منين؟؟
ودخل المجلس بأمر مين؟؟
وعملوا إيه ويا السادات؟؟
مهو برده نايب عننا
حب يرجّع حقنا
ويعرف برده زينا
ولا بلاش تسألوه
أصل ده صاحب ابن أبوه

ياللى فى بلدك سد وعالي

ياللي فى بلدك سد وعالي

اسمع وأنا هحكيلك حالي

علشان خاطري لو لثواني

تفكر فينا أنـا وعيالـي

واسمع منى اللي جرالي

ابني محمد راح الجيش

كسرة نفس وذل شويش

والواد صالح سافر بره

لما زهق من عشته المره

بعد ماكان يحلم لبلاده

يخدمها بعلمه وبزاده

ويزود أمجادها وأمجاده

ويعلم أولاد أولاده

إزاي يعرفوا حب النيل

يحموها جيل ورا جيل

وادي بنتي ضنايا سمية

بعد المدرسة والكلية

وكل الدرجات النهائية

وفلوس رايحة وفلوس جاية

قعدت جانبي مستنية

خايفة لتكون زي اخوتها

فاتهم أبسط حق فى بلادها

وأنا طبعا بخرج ما بجيش

أعمل إيه ماهو أكل العيش

وياعيني محمود ابن جراني

الـواد دوت كـان ربـانـي

جم حبايبنا دقوا الباب

ومن ساعتها والود غاب

أنا مستني أي جواب
أبوس إيدك أي جواب

ياللى عشتنا معاك هباب

الكبير عاوز تمام

ضرب سحل مفيش كلام

الكبير عاوز تمام

اضربوا كل اللي ينطق

واللي ساكت واللى بان

خلو شعبي يعيش جبان

اضربوا مني الأمان

اضربوا كل اللي صور

واللي فكر يوم يحور

الجزيرة وي رويتر والمحور وي البيان

واللي فجأة طلعلوا صوت

اضربوه خليه يموت

خلوا شعبي يعيش ذليل

واحبسوه من غير دليل

خرجوا كل الكلاب

يضربوا من غير حساب

طفل ست شيخ كبير

اضربوا الشعب الحقير

اضربوا كل القضاة

وقولوا عنهم دول طغاه

بس اوعوا تيجى سيرتى

ولا تطلع مرة صورتى

الفيلم ده مش أجنبي

ولاحتى مشهد مغربي

الفيلم مصري

والعصر عصري

والضرب أصلي مش هزار

واللي انضرب ده مش حمار

ولا حتى واحد أجنبي

واللي بيضرب أمن مصري

واللى انضرب ده برده مصري

بس حب يكون له قرار

ويكون ليه رأي واختيار

بس اللي يفرس هو فين؟؟

عارفين طبعا أنا قصدى مين

أنا قصدى صاحب التكية

اللي عاملها ياناس وسية

حد يقولى ياناس ده فين مقلش حتى متأسفين

ولا قال ده غصب عننا

واللي حصل مش قصدنا

طبعا أنا مقصدش تجريح فى المقام

ياخوانا معذور بيديهم تمامآ

..ده أنا هلبخ فى الكلام

بقولكم إيه؟طب سلام

نفسي يابلدي

نفسي يابلدي تحسي جراحنا

وتشوفى ألمنا وهمومنا

ايه يابلدنا ايه اللى جرالك؟؟

ليه المـر بقة ده حالك؟؟

امسحى مرة يابلدي دموعنا

حققى حتى لو نص احلامنا